Guide
2008-10-15 Programa edukashonal na UNA a reanudá p
Deliberashon interno di studiantenan ta kontinuáPrograma edukashonal na UNA
a reanudá pa gran parti atrobe
WILLEMSTAD – Despues di un siman ku akshonnan di studiantenan na UNA, djamars tabata pa promé be ku a reanudá pa gran parti e programa edukashonal. E akshonnan di e studiantenan no ta tras di lomba, pero nan ta deliberando hopi i intensivo internamente pa wak kon huntu ku nan partnernan di kombersashon nan por sali for di e impase ku a surgi. Mientrastantu señor Herman Behr komo e rector magnificus suplente a tene su promé reunion di trabou ku mesora a produsí resultado konkreto.
Eksaktamente un siman despues ku e akshonnan di e studiantenan a kuminsá pa un roster na drechi pa e fakultat sosio-ekonómiko (SEF), e emoshonnan a baha hopi di moda ku djamars por a duna lès atrobe. Ta solamente na SEF e programa ta kompletamente stanká ainda. Na e fakultat hurídiko i esun tékniko a reanudá e programa edukashonal. E lèsnan ta tuma lugá normalmente. E siman aki tin un siman sin roster na e fakultat general, ya ku otro siman tin tèntamen, ku e ora ei tambe ta sigui normalmente.
Deliberashon interno
Posiblemente e mal tempu di djamars tambe a hunga un ròl, pero e grupo di studiantenan den akshon a mengua supstansialmente. E lidernan di e studiantenan a sinta deliberá kasi henter dia riba kon nan por ta sigur ku e enseñansa na UNA por kontinuá di forma apropiá, inkluso na SEF. Nan a diskutí riba un ‘proposishon Cijntje’ ku supuestamente a haña sosten amplio di e komunidat universitario, pero despues a resultá ku ni e Hunta di Studiante (Studentenraad), ni e fakultat hurídiko no ta respaldá esaki, i tambe ku e no ta kuadra ku e reglanan legal ku ta konta na UNA. Kua eskoho e studiantenan a hasi te awor no ta masha kla. Nan mes no a sali afó ainda, pasobra nan por skohe tambe pa aseptá e invitashon di señor Behr pa partisipá den su tim di gerensia ku e dekanonan tambe ta forma parti di dje.
Reunion di trabou
Komo rector magnificus pa un periodo interino djamars señor Behr a tene su promé reunion di trabou ku e tim di gerensia bou di su guia, konsistiendo di representantenan di studiante i di dekano. Pa motibu di e deliberashonnan interno intensivo di e studiantenan, nan no a logra pa tuma parti di e promé reunion aki. Ademas, dos di e kuater dekanonan tampoko no a presentá, esta esun di e fakultat general i esun di e fakultat tékniko. Sinembargo, e reunion a sigui ku dekano interino Roilis Kleinmoedig di SEF i dekano Viola Heutger di fakultat hurídiko. For di e enkuentro esei a sali entre otro ku ta hasi kaso inmediatamente di e puestonan vakante na SEF: riba término hopi kòrtiku lo yena 6 i e 12 puestonan ku tin vakante te awor aki i yenamentu di e otronan nan lo atendé di forma aselerá.