Guide
2009-04-20 Resultado Final Coupe Curacao 2009
Eventonan di esgrima veterano femenino
Janice Midgley (USA) ta gana dos Kopa i Seline de Ridder ku medaya di brons pa Antias
Djasabra atardi 18 di april den auditorio / sala di gimnastik di International School na Emmastad e Estadounidense Janice Midgley a finalisa dos biaha komo kampeon di e kompetensia internashonal di esgrima. Su prome medaya di oro el a logra ku e arma di spada ganando di su paisana Rosana Lacarra. Su di dos medaya di oro el a logra ku e arma di sabel derotando e kampeon di e Kopa di Korsou di 2008 su paisana mundialista Ellen O'Leary.
Nos uniko kompetidor femenino den e kategoria di esgrima veterano riba e arma di spada Seline de Ridder a gana konvinsentemente di e Franses Marie Jose Dupont ku siman pasa a sali kampeon di spada femenino kategoria veterano di e isla Karibeño Martinique. Ku e logro aki e selekshon Antiano a optene su prome medaya di brons den e kompetensia internashonal pa esgrima veterano Coupe Curacao 2009.
Klasifikashon final Coupe CURACAO 2009 Spada Femenino (40+)
1. Janice Midgley (USA)
2. Rosana Lacarra (USA)
3. Seline de Ridder (AHO)
4. Marie-Jose Dupont-Thaly (FRA)
5. Ellen O'Leary (USA)
6. Patricia Shepherd-Foster (GBR)
Klasifikashon final Coupe CURACAO 2009 Sabel Feminino (40+)
1. Janice Midgley (USA)
2. Ellen O'Leary (USA)
3. Patricia Shepherd-Foster (GBR)
Posishon di esgrimistanan feminino Antiano despues di buelta di klasifikashon.
Mester opserva ku Yolienne Martus i Marivia Tuast di nos selekshon feminino di esgrima a kompeti tambe den e kompetensia aki, pero komo ku nan no tin e edat di 40+ nan no a pasa pa final di e kompetensia veterano aki. Komo ku Yolienne Martus a logra posishona na di dos luga riba tabla di posisishon i Marivia Tuast na di kuater luga despues di e buelta di klasifikashon, nan tur dos ta priminti di saka nos kara den futuro asina nan yega e edat veterano stipula pa Federashon Internashonal di Esgrima.
*******************************************
Eventonan di esgrima veterano maskulino
Oro pa Epie Claressa (AHO) riba spada
Djasabra atardi 18 di april den auditorio / sala di gimnastik di International School na Emmastad e yu di tera Epie Claressa a vense e Estadounidense Alfred Cherry ku slor di 5-4. Epie Claressa dilanti di su propio publiko, a tene tur hende den tenshon den e kombate final riba spada maskulino. E kombate a bai tempu kompleto di tres biaha tres minuto, ku e skor empata na 4-4. Den e minuto reglamentario ekstra Epie Claressa pa di dos aña sigui ta bai ku e titulo di kampeon di Coupe Curacao 2009 ganando di e mesun retado di e final di aña pasa Alfred Cherry. Komo nos uniko representante veterano maskulino di Antias Epie Claressa a saka nos kara un biaha mas. Aña pasa e kopa di sabel di e Coupe Curacao a keda konkista pa e mundualista Hulandes Oscar Kardolus, pero e biaha aki tabata nos paisano Epie Claressa ku a konkista e kopa “Coupe Curacao 2009” di e kompetensia internashonal di esgrima veterano.
Na di tres luga bon pa e medaya di brons a finalisa e veterano Michael Vitoux di USA ku a keda elimina pa su kompatriota Alfred Cherry den semi-final ku skor di 10-2.
Klasifikashon final Coupe Curacao 2009 Veterano Spada Maskulino (40+)
1. Epie Claressa (AHO)
2. Alfred Cherry (USA)
3. Michael Vitoux (USA)
Komo un wega di fogeo pa nos mucha hombernan di selekshon hubenil pa e kompromiso kampeonato Panamerikano hubenil na Venezuela otro luna komite organisador a laga nos muchanan tambe partisipa den e buelta klasifikatorio i di eliminashon direkto. Mester bisa ku nos hobennan Antiano di selekshon di esgrima a partisipa ku un resultado ku ta priminti hopi pa nos futuro di esgrima ora nos analisa kon nan a klasifika entre e kompetidornan veterano.
Klasifikashon general despues di prome buelta pa klasifikashon pa eliminashon direkto:
1. Richard Heyliger (AHO)
2. Jairo Jessurun (AHO)
3. Michael Vitoux (USA)
4. Epifanio Claressa (AHO)
5. Bryan Betrian (AHO)
6. Jean Carlos Jessurun (AHO)
7. Alfred Cherry (USA)
8. Urly Cornelia (AHO)
Pero despues di eliminashon direkto ku a tene ku koperashon di e esgrimistanan vetrano internashonal e klasifikashon final a bira:
1. Bryan Betrian (AHO)
2. Alfred Cherry (USA)
3. Richard Heyliger (AHO)
4. Michael Vitoux (USA)
5. Jairo Jessurun (AHO)
6. Epifanio Claressa (AHO)
7. Jean Carlos Jessurun (AHO)
8. Urly Cornelia (AHO)
Pues nos a mira ku den e wega di fogeo Bryan Betrian a konkista e prome luga entre otro dor di gana e dos veteranonan di e final veterano, esta di Epie Claressa ku skor di 10-7 i di Alfred Cherry (bayendo tempu kompletu) ku skor di 8-7. Richard Heylirger a perde tambe di Bryan Betrian de moda ku Richard Heyliger a resulta na di tres luga entre Cherry i Vitoux di USA.
Oro pa Michael Vitoux (USA) riba sabel
Riba e arma di sabel Antias no tabatin niun representante veterano riba sabel. Nos veterano ku por bringa tur tres arma Raymond Jessurun mes no por a subi pista komo ku e tabata okupa ku e organisashon i ku arbitrahe durante di e kompetensianan. Ya ta pa di dos aña konsekutivo ku ta tene e kompetensianan di esgrima veterano aki na Kosou bou di ouspisio di e Konfederashonnan di Esgrima Sentroamerikano i di Karibe I e Konfederashon Panamerikano di Esgrima/
E esgrimista veterano Estadounidense Michael Vitoux a titula kampeon di e kompetensia veterano riba sabel.. E medaya di oro i e kopa riba sabel a bai pues pa Michael VITOUX Vitoux a logra e titulo ganando di su paisano veterano Mark Midgley ku pa prome biaha a debuta den un kompetensia internashonal, lagando esaki na di dos luga pa risibi e medaya di plata.
Klasifikashon final Coupe Curacao 2009 Veterano Sabel Maskulino (40+)
1. Michael Vitoux (USA)
2. Mark Midgley (USA)
Manera nos a relata anteriormente e hubenilnan di selekshon Antiano tambe a haña chens pa partisipa den e bueltanan di klasifikashon, pa asina nan por haña mas eksperensia i pa nan prepara pa nan proksimo kompromiso internashonal ku ta e kampeonato Panamerikano na Venezuela.
Klasifikashon general despues di buelta di klasifikashon Coupe Curacao 2009 riba sabel maskulino
1. Joshua Concincion (AHO)
2. Michael Vitoux (USA)
3. Jairo Jessurun (AHO)
4. Mark Midgley (USA)
5. Urly Cornelia (AHO)
6. Jean Carlos Jessurun (AHO)
E sorpresa tabata Joshua Concincion di 14 aña di edat ku a klasifika na prome luga despues di e buelta klasifikatorio ku 4 partido gana 1 perdi. Anto esun ku el apoerde tabata kontra e debutante internashonal Mark Midgley di USA. Tabata Joshua su prome biaha ku el a debuta riba e arma di sabel anto na su prome kompetensia internashonal! Tambe e hoben estudiante Urly Cornelia a debuta pa prome biaha den un kompetensia internashonal i el a impreshona a base di su trankilidat di wega i su bon dominio di moveshonnan. Nos hobennan esgrimista tambe ta priminti di saka nos kara den kompetensianan regional i nan lo bira e veteranonan di esgrima den futuro ku lo saka kara di nos pais ora nan tambe yega na e edat di ta veterano segun reglanan di FIE.
Entrega di e premionan tabata na enkargo di e veterano Antiano maskulino di mas edat Anton Jessurun (89) i e veterano Antiano feminino di mas edat Edie Bailey (...ssst). E medayanan i e Kopanan tabata opsekia pa Fundashon SEDREKO, mientras ku di parti di Ofisina di Turismo kada partisipante estranhero a risibi un tas ku diferente rekuerdo di promoshon tokante nos dushi isla Korsou.
Tambe e bishitantenan di afo a risibi un gesto di gerente di VISTA Car Rental pa proksimo biaha ku nan bishita Korsou. Ademas tur bishitante a risibi un rekuerdo di Galeria Nena Sanchez i e kampeonnan a risibi un kuadro masha presioso di e artista Kurasoleno aki.
Presidente di NAASB Raymond Jessurun a gradisi na final tur ku a hasi e evento aki posibel, direktiva di International School pa fasilita e sala, tur esnan ku a bin presensia e kompetensia i last but not least e patrosinadornan prinsipal di e Coupe Curacao ku ta Fundashon SEDREKO, Foundation for the Future of Fencing, tur e esgrimistanan di Estados Unidos, Gran Britania, Francia, di Antias (bibando na Korsou i na St Maarten) ku tambe a inverti pa hasi e kompetensia internashonal aki unu eksitoso.