Guide
2009-04-24 ALIDE 39 ta presentá inovashon importante riba tereno di finansiamentu di desaroyo
Komunikado di Prensa
ALIDE 39 ta presentá inovashon importante riba tereno di finansiamentu di desaroyo
den konekshon ku e aktual krisis ekonómiko mundial
Bankonan di desaroyo di Latino-Amerika i di Karibe lo topa ku otro na Kòrsou riba 19 i 20 di mèi próksimo, pa e di trintinuebe reunion di Asamblea General di ALIDE. Nan lo komparti eksperenshanan di kon bankonan di desaroyo i instashanan finansiero den nan paisnan ta reakshonando riba e krisis ekonómiko mundial, ku kreamentu di produkto i servisio finansiero inovativo, pa stimulá kresementu ekonómiko den e reseshon eminente den region.
Dor di ofresé finansiamentu inovativo na e sektornan sosial i industrial, bankonan nashonal di desaroyo ta fungi komo un instrumento di maneho di gobièrnu i di sektor finansiero pa implementashon di paketenan ku ta kontrarestá e krisis i ku ta stimulá ekonomía. BNDES for di Brasil, CORFO for di Chile, BANCOLDEX for di Colombia, NAFIN i FIRA for di Mexico, otro instashanan finansiero renombrá lo interkambiá e puntonan di bista i programanan ku otro, ku nan ta usa pa entamá rekuperashon ekonómiko i sosial, i tambe nan esfuersonan pa kontribuí na na desaroyo duradero di komèrsio i invershonnan den region, for di nan posishon di lider den inisiativanan kontra di e siklo visioso.
Den su presentashon di e tema prinsipal di e reunion: ‘Kambio den ekonomía mundial i retonan pa bankonan di desaroyo den Latino-Amerika i Karibe’, Gonzalo Rivas – eks-bankero di desaroyo na Chili, un eksperto renombrá riba area di finasiamentu i inovashon i aktual presidente di ALIDE su Kuerpo di Konseho General – lo duna un relato riba transformashon di sistemanan di finansiamentu, den kuadro di retonan ekonómiko nobo.
Armando Mariante de Carvalho, vise-presidente di BNDES, ta duna un charla riba e papel importante di bankonan di desaroyo den kontraresto di e siklo visioso den ekonomía, via di nan kontribushon aktivo na rekuperashon ekonómiko; esfuersonan ku lo prueba di ta esenshal den mantenshon di un ambiente di komèrsio i invershon sano riba nivel regional.
Un di e asuntunan mas importante den e situashon aktual ta rekoudashon di fondo pa desaroyo i tambe kreashon di fuentenan alternativa di finansiamentu. Den un panel di representante di e institushonnan finansiero mas prominente di region: CDB, IDB, CAF i CABEI, Compton Bourne – presidente di Caribbean Development Bank – ta duna un charla riba e tópiko aki.
Komo tópiko spesial, lo tin un presentashon di Oscar Espinosa Villarreal – eks-Minister di Turismo di Mexico, riba finansiamentu i desaroyo den sektor di turismo, un sektor ekonómiko di suma importansia den paisnan di Karibe i ku alabes tin un potensial grandi pa kontribuí na desaroyo di paisnan den Latino-Amerika.
Tambe lo duna atenshon na maneho di medio ambiente i kambio klimatológiko, den forma di lansamentu di e “Agènda Bèrdè” (Green Agenda) dor di BNDES.
Durante e Asamblea General tambe lo tin reunionnan di e siguiente komishonnan tékniko di ALIDE: ‘Finansiamentu di Agrikultura’, ‘Empresa Mikro i empresa Chikí’, ‘Medio, invershon i infrastruktura’ i ‘Turismo’. Respektivamente, e komishonnan aki lo trata e siguiente asuntunan: reda di finansiamentu di agrikultura (‘pensando mas aleu di fronteranan di finansiamentu’), ‘Virtual Banking i SME’ (pa fasilitá akseso na servisionan finansiero), mekanismonan i instrumentonan di finansiamentu i stimulashon di turismo.
E Asamblea General ta tuma lugá na Kòrsou, riba invitashon di Korporashon pa Desaroyo di Kòrsou - Korpodeko, for di su funshon di representante ofisial di Kòrsou den ALIDE.
Informashon i inskripshon: www.alide.org.pe
Kontakto: Eduardo Vásquez, Kabes di Relashonnan Institushonal, Telefòn: