Guide
2007-12-10 Torneo di Pasku 2007 [pap]
KOMUNIKADO DI PRENSADia 10 di desèmber 2007
Cadushi ta sigui ketu bai ku su tradishon
Hungadónan di badminton ta
preparando pa Torneo di Pasku 2007
WILLEMSTAD – Esnan afiliá na e diferente klupnan ku ta praktiká e deporte rápido di badminton, sa kiko nan por spera den e temporada aki. Asina ku desèmber habri, nan sa ku e klup Cadushi ta sigui ku e tradishon di hopi aña di organisá e asina yamá ‘Kerstbouten toernooi’. Den fin di siman di 15 i 16 di desèmber ta tempu atrobe den sala na Rust en Burgh pa nan dal e shuttle lihé na e otro banda di e nèt durante un programa intensivo repartí den tres klase di kompetensia.
Bastante aña pasá e klup Cadushi a tuma e inisiativa pa organisá tur fin di aña un asina yamá ‘kerstbouten toernooi’, hustamente ku e idea pa asina sera e aña deportivo di badminton. E aspekto tristu di esaki ta awor ku pa algun aña kaba e torneo aki ta e úniko enkuentro deportivo den e ramo di deporte aki ku a sobra. Ni kompetensia regular di e federashon, ni otro torneo entre e diferente klupnan di badminton no t’ei mas. Tur a muri bai.
Ku respaldo di patrosinadónan manera Helmich Associates, Kusters Trading/Polar, Intermediate, Oduber Agencies i Pepsi Cola e klup Cadushi a logra atrobe pa prepará un torneo kaminda hungadó di badminton den e klasenan A, B i C, tantu femenino komo maskulino, por midi forsa i táktika riba kancha. Tin wega singular, pero tambe dòbel miksto i dòbel maskulino òf dòbel femenino. E aña aki e interes di partisipante di diferente klup lokal ta tal ku nan a prepará un programa intenso di wega repartí riba dos dia. Tur hende ta kordialmente invitá pa den e ambiente dushi di Cadushi bon gosa di tremendo weganan deportivo i pa apoyá e hungadónan.
Ta hunga tur wega den e sala di Asiento na Rust en Burgh ku aktualmente ta den un fase di renovashon. E torneo mes ta kuminsá djasabra dia 15 di desèmber 7 or di anochi ta sigui sigur te 11 or. Riba djadumingu 16 di desèmber ta sigui ku e programa for di mitar di 10 mainta i ta sigui te ora e último wega final ta tras di lomba. Ta kalkulá ku esei lo ta alrededor di 2 or mèrdia.
Mesora despues di e último final tin entrega di premio na e bar chikitu di Rust en Burgh mes. Den e torneo aki ta kustumber pa no parti medaya òf kopa, pero kos útil pa e dianan di fiesta, manera bebida stèrki, biña, kaha di serbes, pan di Pasku, ham, etc.