Guide
2008-04-18 Resultadonan karedanan di Universidat T
Federashon di Atletismo (NAAU) ta sumamente orguyoso di nos atletanan ku un biaha mas a sa di saka kara di nos pais. Ta trata aki di karedanan di training ku a tuma luga na Universidat Texas El Paso (UTEP) kual ta forma parti di e programa olimpiko di e tim di relevo 4x100m i atletanan individual.E prome kareda tabata esun di nos tim di relevo 4x100m. Aki nos ekipo a sa di hasi un bon trabou dor di gana e kareda aki ku un tempu di 39.63 sekonde. E tim a konsisti di atletanan Prince Kwidama, Charlton Raphaela, Brian Mariano i Churandy Martina.
Na di dos luga, ku un resultado di 40.39 sekonde, a sali e tim ku ta konsisti di un atleta di Jamaica i 3 atleta antiyano. Ta trata aki di nos atletanan Geronimo Goeloe, Jairo Duzant i Curtis Kock. E dos prome atletanan no ta deskonosi pa e mundu di atletismo. Ta trata di atletanan ku tabata forma parti di nos tim di relevo 4x100m den pasado i ku a sa di yega na logronan grandi pa nos pais.
Curtis Kock ku si ta forma parti aworaki di nos tim di relevo (komo reserva) a sa di reforsa e tim pa asina e tambe por hana mas eksperensha riba e area aki.
Despues di nos logronan ku e tim di relevo, nos atletanan a kore nan karedanan individual. E prome kareda individual ku a tuma luga ta esun riba 400m. Den e kareda aki a partisipa nos atletanan Curtis Kock i Terence Agard ku a sa di sali na di tres i di kuater luga ku 47.66 i 48.23 sekonde. Ambos a sa di logra nan miho tempunan personal tambe, miho konosi komo PR (personal record). Nan PR anteriormente tabata 48.21 sekonde (Curtis) i 48.57 sekonde (Terence).
A sigui despues ku e karedanan di 100m dash. Aki Korsou mester ta sumamente orguyoso un biaha mas di nos atleta Churandy Martina ku tambe a sa di logra un miho PR. Churandy un biaha ta prueba di ta pertenese na un di e mihonan di mundu ku e tempu di 10.00 sekonde riba 100m dash. Su PR tabata 10.04 sekonde.
Un otro atleta ku a sa di bini bek bon ta Geronimo Goeloe. Gernonimo tambe a sa di logra un miho PR. Ela sa di sali na di dos luga ku 10.27 sekonde despues di tabata kasi hinter 2007 leshona.
Na di kuater luga riba 100m dash a sali un otro atleta di nos ku ta Brian Mariano ku un tempu di 10.44 sekonde. Nos otro atletanan Prince kwidama (10.92 sekonde), Rachmil van Lamoen (10.94 sekonde) i nos kapitan di ekipo Charlton Raphaela (12.77 sekonde) tambe a partisipa na e karedanan. Nos tin di bisa ku den e kareda aki Charlton a leshona su mes kual a pone ku e no por a yega na un miho resultado individual pero apesar di esaki nos ta orguyoso di dje pa su kontribushon na e tim di relevo i su liderasko.
Pa lokual ta trata e karedanan riba 200m nos atletanan a sa di logra un miho PR atrobe. Churandy un biaha mas dor di gana ku un tempu di 20.17 sekonde (anteriormente 20.20) i Brian ku a sali na di dos luga ku un tempu di 20.98 sekonde (anteriormente 21.12).
Jairo Duzant i Rachmil van Lamoen tambe a kore i logra tempunan di 22.01 i 22.50 sekonde.
Ku e resultadonan aki Korsou por ta sigur orguyoso di nos atletanan i por konsidera esaki un stap pa logronan grandi ku ta spera nos den futuro. Despues di un siman di training komo parti di e programa di preparashon, ta sigui awor e karedanan klasifikatorio na Filadelfia i Puerto Rico. Nos ekipo di relevo ahinda no a logra e eksigenshanan pa klasifika pa weganan olimpiko. Komite olimpiko [NAOC] i NAAU a stipula ku e dos kompetenshanan aki ta e ultimo dos oportunidat ku nos tim di relevo lo hana pa por logra klasifika pa Beijing pa weganan olimpiko.