Guide
2008-05-19 Kámara di Komèrsio ta boga pa haña tur
Krísis di energia ta duru pa tur hende
Kámara di Komèrsio ta boga pa haña tur alternativa riba agènda
WILLEMSTAD – Ku optimismo Kámara di Komèrsio ta keda wak futuro ekonómiko di Kòrsou. Sinembargo, e optimismo ta posibel solamente si tur alternativa real pa e energia di krísis ta subi mesa, ku ta prosesá nan i ku ta implementá nan den e meskla korekto tantu pa por superá e krísis aktual komo mantené e kresementu ekonómiko real. Klaro ku esaki ta rekerí di tur e partinan envolví den komunidat pa nan duna nan kontribushon, esta siudadano, trahadó i empresanan, i no na último lugá gobièrnu. Preisnan mas haltu no mag kondusí na mas entrada di belasting; e konsumidó mester haña espasio pa por konfrontá e konsekuensianan di e krísis di energia, manteniendo su forsa di kompra, i asina teniendo na bida tambe e kresementu ekonómiko kontinuo. Gobièrnu tampoko no mag probechá di e krísis di energia aki.
Kámara di Komèrsio a forma parti di e Komishon tripartit ku mester a bini ku proposishonnan konkreto, alternativa òf solushonnan pa frena e oumento di preisnan di energia ku ta konsekuensia di e oumento di preisnan di krudo i di produktonan derivá di zeta riba merkado internashonal, o sea pa suavisá e efektonan di e subida di preis di energia. Anke ku e Komishon finalmente a saka un konseho, Kámara di Komèrsio ta konstatá ku den esaki e Komishon a keda sin proponé numeroso bon alternativa pa por frena e efektonan. Den e Komishon a papia si riba mayoria alternativa, pero nan no a logra un konsenso riba nan.
Kámara di Komèrsio ke kontribuí ku e siguiente elementonan na e diskushon den komunidat tokante e konsekuensianan di e oumento di preis di energia:
- 1. Mester konstatá ku rònt mundu preis di energia a subi drástikamente. Kòrsou no ta forma niun eksepshon i lo mester bai paga e preis mas haltu pa importashon di krudo. Esaki ta okashoná un situashon di krísis ku ta afektá tur hende den komunidat.
- 2. E pregunta ta lanta te kon leu ta rasonabel i hustu ku Refineria Isla (Curazao) S.A. (PDVSA) ta keda sin rekonosé ku e sirkunstansianan a kambia profundamente, den e relashon. E propina – pa no papia di limosna – ku Kòrsou ta haña pa nan hasi uso di e instalashonnan di refinashon ta fuera di tur proporshon ku e moda ku preisnan di krudo a subi a konsekuensia di aktitut di un kartel di produktor di zeta (ku un oumento di mas ku 600% den e 23 añanan for di dia ku Refineria Isla a bini Kòrsou), i e ganashinan enorme ku e refineria ta hasi ku e instalashonnan aki. Aña pasá aparentemente tabata trata di un ganashi di vários shen mion florin. E enfoke na Kòrsou awor ta muchu riba kon pa prevení ku ta forma ‘kartel di tienda den bario’ na lugá di ataká e konsekuensianan di e formashon di kartel di produktornan di zeta ku ta hasi negoshi lokalmente.
- 3. Curoil mester deshasí di e pòmpnan di gasolin ku e ta operá aktualmente pa por stimulá kompetensia entre e pòmpnan. Awor ta bende e produktonan derivá di zeta na e preisnan máksimo, pasobra no por tin kompetensia pa motibu ku Curoil tambe ta den e negoshi aki. Den e kaso aki por papia di un falta di loke nan ta yama ‘level playing field’.
- 4. Tin un opshon simpel pa repartí gasolin den un grado popular i un grado luhoso. Por ofresé e grado popular, ku ta esun di un kalidat masha básiko i ku ta apropiá pa un outo simpel, na un preis mas abou posibel.
Meskos ta e kaso ku gasoil. Ke men banda di e disel industrial òf popular, mester introdusí un disel di luho di un kalidat mas haltu. Pues, e ora ei (porfin) por kobra akseins riba e disel di luho, loke awor no ta e kaso. Outonan di luho te awor ta kore riba disel normal, sin akseins riba dje, i nan ta keha riba kalidat di e kombustibel ku nan rason.
E mesun prinsipio ta konta pa gas pa kushiná kuné. Tin gas pa uso na kas i otro pa uso komersial, pero nan no ta diferensiá nan físikamente. Si duna e bòm di gas komersial un otro koló, por distinguí klaramente si e gas pa kushiná supsidiá pa uso doméstiko, realmente ta yega su destinashon korekto.
Resumiendo: e statistiknan lokal di konsumo di gasolin ta mustra ku tin posibilidat pa eksonerá esun ku ta usa gasolin regular (92): un oumento mas grandi di preis pa gasolin super (95), destiná pa vehíkulonan nobo di luho, kombiná ku un oumento ménos grandi pa esun regular, lo duna e mesun resultado pa Curoil komo ku ta bende muchu mas gasolin super ku esun regular. - 5. Introdukshon di un supsidio fiskal pa bùs chikí despues ku a determiná e pèrdida ku nan ta hiba ora hisa preis di disel na nivel di merkado. Asina por limitá ku pueblo mester mas pa kada kareda di bùs. Shofùrnan di bùs, ku por mustra na servisio di belasting den nan atministrashon e pèrdida ku nan ta sufri, ta bini na remarke pa un supsidio fiskal.
- 6. Siguientemente reorganisashon di e sistema di transporte públiko pa medio di introdukshon di un empresa di transporte ku un forma efisiente i efektivo – pues na mihó preis – ta kuadra ku e nesesidat di transporte públiko. Esaki lo evitá ku e públiko mester tuma mas ku un bùs pa yega su destino.
- 7. Benchmarking di gastunan di produkshon di e empresanan lokal di utilidat. For di intenshonnan di gobièrnu di Kòrsou ta resaltá ku na aprel 2008 nan tabata ke introdusí e rekomendashonnan for di rapòrtnan di ouditoria. Mester kuminsá hasi kaso.
- 8. E pregunta ta surgi si gobièrnu mester bai probechá di e oumento di preisnan di energia. Mester investigá ki posibilidat tin pa gobièrnunan kontribuí na wanta e forsa di kompra pareu pa tene ekonomia riba e bon kaminda, i hasiendo esei garantisá ku gobièrnunan ta haña e entradanan ku a premirá. En todo kaso, for di loke nan ta haña adishonal na entrada for di ‘omzetbelasting’ a konsekuensia di e preisnan ku ta subi, gobièrnunan mester duna bèk na siudadanonan pa nan por mantené nan forsa di kompra un poko. Por ehèmpel. OB di 5% riba un galiña kompleto di 5 florin ta produsí 25 sèn na OB. Awor ku e galiña su preis a subi te 10 florin, esaki ta produsí 50 sèn na OB. E dies plaka èkstra aki mester bai bèk pa e suidadano, sino gobièrnu ta probechá di e subida di e preisnan riba kustia di e siudadano!
Ta bini aserka ku awor ya ta kobra OB dos biaha riba benta di kombustibel: un baha ora Curoil bende ku pòmpnan i un biaha ora e pòmpnan ta bende na e konsumidó, di moda ku e siudadano ta paga OB dos biaha pa e mesun produkto. En efekto, e OB riba gasolin no ta 5%, pero mas ku 10%. - 9. Un oumento so di sueldo mínimo, ònderstant i penshon di behes (AOV) pa kompensá e redukshon di forsa di kompra, ta ignorá e echo ku henter poblashon ta konfrontá ku su forsa di kompra ta bai atras. Riba e pèrdida di forsa di kompra ku a surgi tambe ora resientemente nan a subi e prima di AOV, esaki ta nifiká un sla duru pa e klase medio i e por kondusí na konsekuensia ekonómiko serio.
E oumento di sueldo mínimo lo pusha e kategorianan di sueldo di un moda ku nan ta surpasá e nivel aktual di kategoria di sueldo mínimo. Si bai di akuerdo ku esaki, esei ta nifiká ku ta kousa un spiral di oumento di preis i sueldo ku lo afektá e progreso ekonómiko di Kòrsou seriamente ku tur konsekuensia ku tin, manera seramentu di negoshi i pèrdida di trabou, spesialmente i kuminsando na e empresanan chikí. Mester prevení ku sukumbí na e eksigensia pa kompensashon atraves di oumentonan di sueldo. Mester prevení ku nos ta bai kai den un spiral di sueldo i preis.
Den e kaso di e krísis energétiko, no tin niun solushon fásil i rápido pa e krísis di energia ku a surgi. Loke si tin ta e posibilidat pa e komunidat aki konhuntamente ta dediká na mantenshon di loke huntu nos a alkansá. Esaki ta rekerí di kada ken, tambe i spesialmente di gobièrnu i sindikalismo, ku di un forma serio ta salvaguardiá e desaroyo ekonómiko di Kòrsou, ku ta mantené empleo, i ku ta laga espasio habrí pa kresementu den otro sektornan, aparte di loke e sektornan di konstrukshon i ‘horeca’ ta generá na impulso. Ta dentro di e kuadro aki ta mas ku kla ku den nos komunidat no tin espasio pa baha kabes pa e preshon ku lo kondusí na oumentonan di preis ku no por relatá direktamente na e krísis di energia. E desishon di gobièrnu pa interferí den asuntu di preis dor di stipulá porsentahe apsoluto na ganashi riba sierto produkto, pa definishon lo kousa un eskases riba merkado lokal i por konsekuensia ta inkietut sosial. E kosnan ku ta duna un kontribushon mas importante den atendé ku e retonan eksitosamente ta oumento importante di produktividat di nos komo pais, stimulá pa un kompetensia konforme merkado, fleksibilidat riba merkado laboral, ku trahadónan kompetente i determinashon pa alkansá nos metanan.