Guide
2008-11-13 Komunikado Pa Prensa
KOMUNIKADO PA PRENSA
Dia di deporte pa mucha i hóben diabétiko en konekshon ku dia Internashonal di diabétiko
En konekshon ku Dia internashonal di diabétiko, SOKUDI ta organisá speshalmente pa mucha i hóben diabétiko un dia di deporte djasabra awor dia 15 di novèmber, for di 11:30 mainta na SDK. SOKUDI ta invitá tur mucha ku ta inskribí na SOKUDI pa partisipá. Esnan ku no ta inskribí tambe ta bon bini, por fabor tuma kontakto ku ofisina na telefon : di djaluna te ku djaweps, di 08:00 pa 12:00 i di 13:00 pa 17:00. E aktividat aki, bou di guia di profeshonalnan di Sedreko ta pa henter famia I ta kompletamente grátis.
E federashon Internashonal di diabétiko a skohe komo tema e aña aki Mucha i diabétis I pa e motibu aki nos di SOKUDI a skohe pa tene un dia di deporte,kaminda moveshon den un forma agradabel i kontrolá lo ta e aktividat sentral huntu ku otro sorpresa agradabel. Un biaha mas partisipashon ta kompletamente grátis. .
Diabétis i mucha
Diabétis ta un di e malesanan króniko mas komun ku ta afektá mucha. E por asotá mucha di kualke edat, asta yu resien nase i beibi. Si no konstatá e malesa aki den un fase tempran e por ta fatal o por resultá den daño selebral serio. Ainda ta asina ku diabétis serka mucha hopi bes ta keda diagnostiká komo grip òf no ta keda diagnostiká mes. Kada mayor, maestro di skol, dòkter òf kualke persona ku ta enkargá ku kuido di e mucha, mester ta familiar ku e señalnan di atvertensha i keda alerta pa menasa di diabétis
E señalnan aki ta: urina frekuente, tin set konstantemente, ta sinti haber kada ratu, ta pèrdè peso, ta sinti kansá (fatiga o kurpa kansá), falta di interes òf no por konsentrá, sakamentu òf doló di stoma (hopi bia ta kiboká i diagnostiká esaki komo grip)
Serka mucha ku diabétis tipo 2 e síntomanan por ta mas suave òf asta no ta manifestá mes.
Diabétis tipo 1 i tipo 2.
Diabétis ta un malesa króniko ku ta debilitá e pashènt i asta por ta fatal. E ta manifestá su mes komo resultado di problema den produkshon i suministrashon di e hormona insulina den kurpa humano. Nos kurpa mester di insulina pa por usa e energia ku tin den nos kuminda. Na momentu ku un hende ta diabétiko, e ta produsí tiki insulina òf e no ta produsí insulina mes (tipo 1) , òf e kurpa no por usa e insulina efektivamente ku e kurpa ta produsí (tipo 2). Diabétis tipo 1 ta e tipo di diabétis ku bo no por prevení. Globalmente e ta e forma mas komun di diabétis bou di mucha mas o ménos 500 mil mucha bou di 15 aña.
Sinembargo obesidat kresiente serka mucha i e estilo di bida ku poko moveshon (aktividat físiko) ta pone ku diabétis tipo 2 tambe ta kresiendo rápidamente bou di mucha i adolesente. Na sierto paisnan (p.e. Hapon) diabétis tipo2 a bira e malesa mas komun serka mucha
Na Kòrsou nos tin na SOKUDI 68 mucha/hóben inskribí komo diabétiko (tipo 1& 2).
Globalmente tin alrededor di 500,000 mucha bou di 15 aña ku diabétis tipo 1.
• tur dia 200 mucha ta haña e malesa tipo 1
• tur aña 70.000 mucha bou di 15 aña ta desaroyá diabétis tipo 1
• tipo 1 ta subi ku 3% tur aña (globalmente)
• tipo 1 ta desaroyá mas rápido di 5% pa aña serka mucha di skol preparatorio
• E paisnan ku e porsentahe di mas haltu di diabétis tipo 1 bou di mucha ta : Finlandia, Suecia i Norwega
• Diabétis tipo 2 a keda reportá serka mucha asta na edat di 8 aña i rapòrtnan ta mustra ku awor e ta manifestá serka muchanan ku anteriormente no tabata kore riesgo. Den komunidatnan nativo i indígena di Estádos Unídos, Canada i Oustralia porlomenos1 di kada 100 mucha tin diabétis. Serka sierto komunidat e ta 1 di kada 25.
• Mas ku mitar di e muchanan aki ta desaroyá komplikashon denter di 15 aña.
• Estudionan global a demostrá ku por prevení diabétis tipo2 dor di laga e muchanan baha 7 pa 10 porshento di nan peso i halsa aktividat físiko na un nivel modesto.
• Diabétis tipo 2 serka mucha ta birando un asuntu di salú públiko global ku potensial pa konsekuensianan serio
• Diabétis tipo2 ta ataka tantu paisnan desaroyá komo esnan den desaroyo.
Informashon risibí di IDF ( International Diabetes Federation) di kua SOKUDI ta miembro.
Silvana Willems Trinidad
Presidente SOKUDI