2009-01-21 Rector Magnificus ta splika su punto di bista
KOMUNIKADO DI PRENSA
19 di yanüari 2009.
Den karta na empleadonan di UNA
19 di yanüari 2009.
Den karta na empleadonan di UNA
Rector Magnificus ta splika su punto di bista
WILLEMSTAD – Den un karta ku el a dirigí awe na tur empleado di Universidat Nashonal di Antia (UNA), Rector Magnificus prof. dr. Jeanne de Bruijn a splika klaramente ku e no ta ambishoná un didos término den e funshon ei i ku for di siman pasá el a pone su funshon na disposishon di e Hunta di Supervishon di UNA. Tanten ku e Hunta no tuma niun otro desishon, ta keda den funshon i e ta sigui traha normalmente.
Señora De Bruijn ta splika ku e no ke laga UNA na kaya i ku e ke sigui kontribuí na algun meta ku a palabrá kuné dia ku nan a busk’é pa e bin tuma rienda na UNA. Esei tabata mas bien pa e bin traha riba e terenonan di akreditashon (halsa valides di diplomanan di UNA), kurso nobo i internashonalisashon (perkurá pa UNA su reputashon haña rekonosementu internashonal). No mas ku siman pasá el a eksperensiá durante selebrashon di e di-30 aniversario di UNA kuantu forsa positivo ta aktivo ketu bai na UNA.
Pa UNA por logra e metanan ku el a pone su dilanti pa kumpli ku studiantenan, nivel haltu di enseñansa i investigashon sientífiko di nivel, e Rector ta suprayá ku tabata nesesario pa tuma medida enkuanto e relashon ku Curises i den e mesun rosea den SEF (e fakultat sosial ekonómiko). For di añanan ’90 a sali diferente rapòrt tokante e problemanan ku a surgi entre Curises i UNA i tur ta papia palabra kla. Den e dos añanan i mei ku e ta na UNA, el a sinti ku ta yega un momento ku e relashon aki ta yega na su fin, pasobra kada biaha e tabata topa esaki den su kaminda, loke tabata strob’é di traha na akreditashon, kurso nobo, investigashon i internashonalisashon. Den esaki el a referí na dos remitido di señora Els van Capelle den Antilliaans Dagblad, na sèptèmber i na e luna aki, ku a dal e klabu riba su kabes.
Despues di hopi diálogo, deliberashon i konsiderashon, na dado momento Hunta di Supervishon a pone un punto tras di e relashon ku Curises. E mes, den su funshon di Rector, a aktua segun su konsenshi i a aktua a base di su responsabilidat na interes di e universidat Antiano kaminda mester tin un ambiente sano i studioso pa por logra lo máksimo ku e studiantenan; kaminda e studiantenan sa ku nan diploma ta rekonosé pafó di Kòrsou tambe; kaminda ta hasi investigashon sientífiko, i kaminda komunidat mes ta piki e frutanan di e talentonan ku e ta produsí.
E Rector a nota ku e diskushonnan públiko tokante e situashonnan ku a surgi na UNA i sigur e forma ku medionan di komunikashon tabata reportá di esei tabata hopi fuerte. Nan no a vasilá pa apliká spekulashon, mitar bèrdat i kosnan inkorekto – i pa bringa kontra esei ta masha difísil, e ta kansa hende i e ta motibu pa hopi prekupashon. Di otro banda, tabatin elementonan positivo tambe, manera ku nan ta rekonosé nos universidat komo un instituto di interes nashonal. Nan a ripará tambe hopi sosten for di komunidat pa e pasonan ku a tuma, ni maske ku riba tereno personal e efektonan ta di lamentá. E interes mas ayá ta esun pa garantisá e studiantenan i nan mayornan un klima apropiá pa enseñansa avansá i transparensia riba tur nivel. Den esei no tin espasio pa niun sorto di konflikto di interes, ni pa tareanan den banda loke ta bai a kosto di e dedikashon na trabou pa UNA.
“Ta mi speransa ku tur e desaroyonan nesesario ku nos ta aden diki-diki awor aki, finalmente lo kontribuí na un universidat fuerte kaminda ta dushi pa traha, hasi investigashon i studia”, asina señora De Bruijn a skirbi. Pa evitá kualke malkomprendementu, el a agregá ku e no a haña su retiro, e no a tuma retiro i e no a bandoná UNA tampoko. E ta sigui hasi su trabou. Huntu ku Hunta di Supervishon ta wak kon ta sigui riba e kaminda aki.