Guide
2009-05-20 Demokrasia di Kòrsou ta riba un bòm
Demokrasia di Kòrsou ta riba un bòm
Si opshon NO lo a haña djis ún voto mas ku 50% den referèndem, lo mester a bari e pakete for di mesa ku gobièrnu a negoshá. Esei ta demokrasia. Di mes manera e pakete mester keda riba mesa, awor ku 52% di votadónan a aprob’é.
Lo tabata alarmante kaba si e gritu pa rechasá voto di mayoria lo a sali for di pueblo. Pero ta mas alarmante ainda ora ta representantenan di pueblo mes ta trata na inyektá e venenu ei den pueblo. Mas ku tur hende, nan mester defendé e prinsipio ku bos di mayoria ta sagrado. I mester evitá ku ta rebahá Kòrsou na leinan di ‘jungle’, kaminda ta sigui bringa otro a todo kosto te ora e minoria imponé su deseo riba mayoria. Si pèrmití esaki den referèndem, kiko ta para mayan den elekshon?
Den intentonan pa tapa bos di pueblo, ya a trese diferente argumento un banda.
E argumento mas venenoso pa desbaratá bos di mayoria, ta esun basá riba argumentonan rasial. Kabesantenan polítiko di kampo NO ta reklamá ku opshon SI a haña mayoria danki na voto di latinonan i hulandesnan. E mesun hendenan ku a bringa añanan largu (ku hopi rason) kontra di Verwijsindex Antillianen na Hulanda, awor ta krea Verwijsindex pa latino i hulandes na Kòrsou. I aworó tambe pa hende di orígen boneiriano, arubiano, islaribeño, surinameño, chines, portugues, arabir, dominikano, haitiano òf otronan.
Kòrsou mester paga tinu. Tur pais na mundu tin diferensia di opinion. Riba su mes, nunka esei no ta un problema.
Ta e manera ku ta dil kuné ta marka e diferensia entre demokrasia i diktadura.
Kousa Komun,