Guide
2009-06-16 FUNDASHON EMPODERÁ KÒRSOU A BIRA REALIDAT
FUNDASHON EMPODERÁ KÒRSOU A BIRA REALIDAT
Willemstad – Djasabra último a pasa akta pa lanta Fundashon Empoderá Kòrsou (FEK). Meta prinsipal di e fundashon ta pa na di promé lugá empoderá e suidadano di Kòrsou pa esaki por desaroyá su talentonan i hasi máksimo uso di nan dor di (yuda) eliminá dependensianan ku ta stroba e empoderashon aki. Na di dos lugá, FEK ke stimulá e suidadano pe ta aktivo i responsabel pa su aktonan i alabes ta solidario pa ku su próhimo. Den esaki ta importante pa un i tur respetá otro i respetá otro su derechinan fundamental.
E sinku hendenan ku a tuma inisiativa pa lanta FEK ta Sr. Micheal Samson, Presidente; Sr. Percy Pinedo, Vise Presidente; Sr. Alex Rosaria, Sekretario; Sr. Mike Franco, Tesorero; Sr. Eugene Rhuggenaath, Segundo Sekretario i Segundo Tesorero.
“FEK ta un inisiativa ku a surgi 3 aña pasá. E nesesidat pa empoderá nos suidadanonan i stimulá un suidadania partisipativo a bira mas relevante awe ora nos tuma na kuenta e divishon eksistente i e echo ku esaki a keda asentuá durante di e proseso di referendum,” segun Micheal Samson.
FEK ta un organisashon a-polítiko i ta habrí pa un i tur, di kua koló polítiko òf no, ku ta agregá balor na e trabounan di e fundashon su trabounan.
Pronto lo presentá aktividatnan konkreto di e fundashon. FEK ta gradesí un i tur ku a manda felisitashon i pronto lo tuma kontakto ku esnan ku a bisa di ke duna un man.