liveincuracao.com

advertising | contact

Curacao information - LiveInCuracao.com

2007-12-10 Demonstrashon Kacho di Vigilansia [pap]

KOMUNIKADO DI PRENSA
Dia 10 di desèmber 2007.


Djasabra tin demonstrashon na Dobberman Club na Saliña


Securitas Antias ta tèst forma nobo pa
vigilansia ku kachó riba merkado lokal


WILLEMSTAD
– E kompania di seguridat Securitas Antias ta koperá ku e kompania Hulandes W&Z Beveiliging pa tèst un forma nobo di vigilansia ku kachó riba merkado di Kòrsou. P’esei djasabra awor, dia 15 di desèmber, nan ta duna un demonstrashon públiko na Saliña.

Securitas Antias i W&Z Beveiliging ta na punto di kuminsá un pilot project pa servisionan di seguridat ku kachónan spesialmente di trein. Hustamente pasobra esaki ta bai muchu mas leu ku loke te awor ta norma den e sistema ku aki ta apliká vigilansia ku kachó, e partnernan a palabrá ku nan ke tèst kon e sistema nobo ta funshoná den práktika i si tin sufisiente interes p’e for di merkado. Su aplikashon ta rekerí sierto invershon pa loke ta tempu, energia i kapital i p’esei nan ke tin un grado di siguransa ku lo tin sufisiente kliente ku ke hasi uzo di e servisionan spesial ku kachó.
Por ehèmpel, por laga e kachó di trein huntu ku un persona ku ta guia e kachó riba terenonan habrí ora ta buska pista di kiebro òf ora tin disturbio. Riba instrukshon di nan bas e animalnan aki ta buska un persona spesífiko òf un opheto ku e persona en kestion tabatin den su man, manera un pata di kabra, yabi di un seif, etc. Asina e kachónan aki ta yuda a base di e forma òf holó pa haña ophetonan bèk, pa lokalisá intruso, pa apartá un persona ku nan ta buskando den un multitut bochinchero, i ataká esun na momento ku e ke hòrta algu. E persona ku nan ta buska no por hui tampoko. E kachó di un moda sutil pa indiká su bas ta ken. E no ta hasi nada tanten ku e persona ei no purba kore bai. Kontrali na hopi otro kachó di vigilansia, esnan aki ta rechasá tur kuminda di otro hende ku no ta nan bas. Uso di e kachónan aki ta habri e posibilidat pa kubri muchu mas tarea i áreanan mas grandi di un forma mas efektivo, miéntras ku por pone e empleadonan riba mas òf otro tarea.

Demonstrashon riba djasabra
E siman aki ya dos di e kachónan di vigilansia di trein di W&Z a yega Kòrsou. Ta trata di kachónan bastante grandi ku tin e mesun tipo di sertifikado ku e kachónan spesialista di polis tin. Djasabra awor for di 5 or di atardi lo demonstrá públikamente riba tereno di Dobberman Club pegá ku Albert Schweitzer College na Saliña kiko e kachónan aki ta kapas n’e. E ora ei lo mustra tambe ku no ta trata aki di kachónan rabioso ku ta gruña i morde pa loko, pero bestianan ku ta di trein di tal moda ku nan ta yuda vigilantenan di un forma trankil i efikas den nan trabou di patruyahe i ku ta drenta akshon kontra malechor solamente ora esei ta realmente nesesario òf ora e haña tal instrukshon.

Kachó spesial pa listra
Na Hulanda W&Z Beveiliging a optené un tremendo reputashon tambe pa su aplikashon di kachó pa listra, por ehèmpel pa detektá droga, inkluso den establesimentunan di ‘horeca’ i na boka di trabou, òf eksplosivo den e lucha kontra terorismo. Pa e servisionan spesialista aki W&Z Beveiliging ya por konta instansia i empresanan renombrá na Hulanda entre su klientenan.