Guide
2008-01-14 Aktitut di Gobièrnu ta poko transparent
KOMUNIKADO DI PRENSA
Dia 14 di yanüari 2008.
Aktitut di Gobièrnu ta poko transparente
Berenschot en espera di konfirmashon
di aplikashon korekto di prosedimentu
Dia 14 di yanüari 2008.
Aktitut di Gobièrnu ta poko transparente
Berenschot en espera di konfirmashon
di aplikashon korekto di prosedimentu
WILLEMSTAD/UTRECHT – Ainda Gobièrnu di Kòrsou no a duna kontesta ni splikashon satisfaktorio riba mas ku un petishon pa aklará e prosedimentu di selekshon. No ku e ofisina Hulandes Berenschot ta pretendé ku nan mester a haña e enkargo pa traha un struktura gubernamental nobo pa Kòrsou ora e drenta e posishon di outónomo den Reino Hulandes. Pero e petishon riba su mes di Defensor di Pueblo di Kòrsou na Gobièrnu pa denter di 6 siman dun’é un aklarashon ta indiká kaba, manera medionan di komunikashon tambe a sugerí, ku posiblemente no a sigui e trayekto korektamente. Loke Berenschot ke ta pa Gobièrnu mustra bon kla i dokumentá ku tur kos a bai segun regla.
Na kuminsamentu di desèmber 2007 Berenschot i un otro ofisina tabata e dos último kandidatonan pa e enkargo di Gobièrnu pa dentro di tres luna bin ku un plan pa organisá e sistema gubernamental nobo pa Pais Kòrsou. Dia 5 di desèmber e desishon a kai: Berenschot a kai chikí. Riba su mes esei no ta nada. Pero e situashon ta kambia ora por ehèmpel den prensa a krea e impreshon ku Berenschot berdaderamente tabatin e oferta mas kumbiniente, pero ku el a keda sin inkluí 5% OB den su preis. Esei no ta kuadra ku realidat. Ademas, prensa mes a publiká ku e proseso no a kana di forma korekto, loke a keda konfirmá despues pa otro fuentenan. Ya ku esei ta tira un mancha mahos riba un prosedimentu pa un materia asina importante pa Kòrsou, manera organisashon di su gobernashon, na dos okashon Berenschot a pidi hefe di Stafbureau pa aklará un ke otro, pero ámbos be Gobièrnu a laga sa ku e no ta dispuesto pa kumpli ku esei.
E petishonnan di Berenschot a haña mas forsa na momento ku mei-mei di desèmber Defensor di Pueblo a base di publikashonnan den prensa lokal a akudí na despacho di Gobièrnu na Skalo pa haña tur informashon al respekto. Defensor di Pueblo a laga sa ku tantu palabra ku por lo pronto e no ta konvensí ku aki no ta trata di un aktitut inkorekto di Gobièrnu. P’esei ofisina di Defensor di Pueblo ke tur dokumento relevante tokante e selekshon dentro di 6 siman pa e por husga. No tabatin niun kontakto entre Defensor di Pueblo i Berenschot riba e asuntu aki.
Tende testigu
Atraves di su abogado Aike Krips di e ofisina lokal VanEps Kunneman VanDoorne, Berenschot a manda un karta pa Gobièrnu fechá 21 di desèmber kaminda ta konfirmá un biaha mas ku ta derecho di Gobièrnu pa skohe un otro ofisina. Sinembargo, di Gobièrnu mester por spera ku e ta atené na regla di lei i e prinsipionan di gobernashon responsabel. Ademas, reglanan di destaho públiko ta rekerí pa Gobièrnu por mustra ku rasonnan bálido ku e eskoho a kai riba otro ofisina, pero esei mester sosodé a base di argumentunan bon i transparente. Por kita e impreshon di un kaso arbitrario solamente si di forma adekuá suministrá informashon tokante e prosedimentu ku a apliká den e asuntu aki. Na nòmber di Berenschot a manda informá bon kla na Gezaghebber Lisa Dindial ku, si Gobièrnu duna no informá adekuadamente, nan ta konsiderá pa akudí na korte di hustisia pa laga tende testigu bou di huramentu pa asina haña sa e bèrdat kompleto tòg. Te awor aki Gobièrnu di Skalo no a reakshoná riba e karta di e abogado di Berenschot.