Guide
2008-03-02 Konseho di Kàmara di Komè
PERSBERICHT
3 maart 2008
Konseho di Kámara di Komèrsio enkuanto presupuesto di CTB:
“Mester hinka aden pa por saka afó”WILLEMSTAD – Ni maske kon noble e aspirashon di Gobièrnu di Kòrsou ta pa purba alkansá un presupuesto ekilibrá, e idea ku e siman aki a bira konosí pa kòrta 7.5 mion florin for di presupuesto di e ofisina di turismo CTB, en efekto ta un eskoho ku por deskribí komo ‘penny-wise, pound-foolish’. Kámara di Komèrsio di Kòrsou ta karesé di inteligensia pa bai ekonomisá nèt den e sektor di kresementu di ekonomia mas fuerte, esta turismo. Loke lo mester ta un vishon, awor parse mas bien un reakshon di pániko. Loke e sektor aki mester pa por sigui krese ta un klima empresarial ‘stabil’: sin kòrtamentu, sin oumento di gastu i/òf ekspanshon di impuesto. Esei lo kondusí na mas konfiansa, mas invershon, kresementu i asina tambe mas empleo i aktividatnan, i konsekuentemente na un base fiskal mas amplio. Ku otro palabra, mas entrada na belasting.
Kámara di Komèrsio di Kòrsou ta respaldá e importansia di un presupuesto balansá. Esei ke men ku ta balansá gastu i entrada, loke ta kuadra ku e prinsipionan di antaño di hiba negoshi, pero tambe ku e prinsipionan mas moderno di ‘good governance’. En bista di un desaroyo sano di nos komunidat – i pa duna Pais Kòrsou na salida un posishon finansiero sano – Kòrsou a komprometé su mes pa entrante 2008 no fia mas plaka ku loke e isla por karga a base di e asina yamá norma di peso di interes.
Konsumo di salubridat
Pa hopi aña tras di otro a fia sèn di un forma iresponsabel, loke a pone ku gastunan di finansiamentu ta ranka no ménos ku 30% for di presupuesto. Awor ku porfin Gobièrnu Insular ta eksplorá e posibilidatnan pa un presupuesto balansá, lo tabata lógiko si nan a kuminsá skrap e inefisiensianan den ehekushon di e tareanan gubernamental for di presupuesto ku tur e polítikonan a toler á tur tempu. Banda di un redukshon general di nivel di previshonnan públiko mester wak eksplísitamente entre otro e dispidimentu enorme den kuido di salú (ku ta kubri mas ku 17% di e presupuesto total), no komo konsekuensia di e oferta ku tin na kuido den merkado, pero mas bien a konsekuensia di un falta di kontròl efektivo, sigur pa loke ta e ‘konsumo di kuido di salubridat’. E parti di servisio i kuido sosial (9% di e presupuesto total) a frena e proseso pa pone individuonan bira aktivo ekon&o ac ute;mikamente. Ademas, enseñansa (mas ku 17% di presupuesto) no ta produsí e rendimentu korekto (ku ta kuadro ku demanda di merkado i di kompetensia) ku por spera di e invershonnan.
Kresementu ta krea espasio
Por tin un argumentashon tambe, por ehèmpel pa oumentá e invershonnan den enseñansa i reservá medionan pa drecha kuido di salú òf kuido sosial. Den esei mester tene kuenta tambe ku e echo ku e plaka di gobièrnu no ta bini di ‘Eilandontvanger’ – e pensamentu ku Gobièrnu ta apliká den e kaso di FEFFIK – pero ku e plakanan aki en efekto ta bini di siudadano i kompanianan; esei ta deskribí e realidat korektamente.
Simplemente bisá, mas tantu hende ta na trabou komo resultado di mas aktividat ku di kresementu ekonómiko a generá, mas entrada gobièrnu por risibí pa di un forma apropiá kumpli ku su tareanan. Kresementu ekonómiko no por sin invershon (ekonomia ta representá apénas 4% den e presupuesto insular) i nan na nan turno lo no tuma lugá tanten ku e isla no ta konosí òf ku e no ta atraktivo. Den esaki merkadeo dirigí ta un instrumento importante: mester hinka ‘den pa por saka ’fó!
Esaki ta enserá ku Gobièrnu mester pensa bon kon e ta kòrta den su presupuesto i sigur e no mester bai kòrta sin mas 7.5 mion florin den e kontribushon pa CTB. Lòs di esaki CTB mes mester bai evaluá bon den su seno e nesesidat i efektividat di gastunan, manera 600.000 mil pa aña pa su website, 1.5 mion pa bolsa komersial i seminarionan i no ménos ku 3.5 mion florin na relashonnan públiko.
Turismo ta karga kresementu
Kòrta siegamente den e portafolio ekonómiko en todo kaso ta ‘penny-wise & pound-foolish’, sigur awor ku e sektor di turismo aki en efekto ta karga e kresementu ekonómiko di e último dos añanan i ku lo sigui karga esaki den e añanan binidero. Ora ta traha di forma kreativo na solushonnan alternativo, no mester p èrdè for di bista ku turismo ta un produkto di eksportashon i konsekuentemente e mester kompetí ku otro destinashonnan internashonal. Si banda di e tarifanan haltu di aeropuerto i kargonan di aviashon, ta konfrontá e sektor aki ku diferente otro kargo ekonómiko mas, Kòrsou mes ta pone ku e no ta kompetitivo mas den e merkado mundial.